PARI E DISPARI

Da quannu trasiu in vigore u sistema delli targhi pari e dispari, forsi l’inquinamentu nun è cangiatu né diminuitu, anzi – secunnu mia – è propriu pricisu e identico a prima a giudicari da la puzza dill’aria ca respiramu.
Sunu cangiati invece i rapporti tra pirsone, vicini di casa, fidanzati, colleghi di travagghiu e compagni di scola.
Per esempiu, Giessica , a’ cumpagna di banco di me figghia a’ nica, ca ha statu sempre tannicchia superba, doppu tri anni di scola all’improvvisu addiventau gentili. Invitò me figghia a so casa e quannu iu m’appresentai pì pigghiari a me figghia (me maritu dici ca chissi sunu cosi di fimmini), a matri di Giessica, ca è ‘na signora chi sta vistuta di casa tutta firmata e lustra, m’abbrazzau, mi dissi ca era felicissima di canuscirimi ( a mmia ? ) e quannu seppi ca iu aiu machina cu’ targa pari, siccome “ le nostre bambine sono così amiche” picchì non pinsari ad accurdarine iu e idda (pari e dispari) pì lassari e pigghiari a scola “ le bambine”? A mmia mi ni vinni un autru travagghiu, me figghia è filici d’aviri amica Giessica, a signora - ca secunnu mia tempu libero n’avi assai - pigghiau un ternu.
L’autra me figghia , doppu jurnati ca ha statu nirbusa , cu l’occhiali di suli macari quannu chiove, niura di faccia ( si fa a’ lampada !) e di umore, l’autra sira si sfogau e mi cuntau ca avia lassatu u’ zitu. Iddu arrisultò nt’el seguente ordine: egoista, munzignaru, tradituri, lavativo, cosa inutile, cosa fitusa e ppoi ….pensa, pensa ‘ nun avi mancu dui machine pari e dispari’ !!
Doppu anni di scerri condominiali ‘ntra me maritu e u’ signor Filippo ca sta ‘nt ‘all’appartamentu di supra, all’improvvisu turnau la paci picchì ,duranti un jornu dispari ca’ chiudeva comu diluviu, me maritu (dispari magari iddu) attruvau a la fermata dell’autobus u’ signor Filippo fracidu d’acqua e di bili picchì aspettava u’ bus da ‘na bona mezz’orata. Ci fici pena e ci diede un passaggio supra ‘a machina. E chi fu? Miracolo. Ringrazziamenti a mai finiri pì me maritu e parulazzi ( ca nun pozzu arripetere) pì u nostru signor Sindaco !

(M G Nicoletti)